احببت خديجة ريحانة الجنة ج١٥ والاخير
**خديچة بنت زي بنات كتير بتحلم وتحب وتتمني تعيش قصة حب مع الانسان الوحيد اللي حبته وقلبها دقله…الخوف والخجل والكبرياء منعوها زي كل البنات انها تعترف لزين بحبها او تلمحله…
كل اللي لام خديچة انها كانت تتصل بزين وتفهم منه!!! هو ده منطق مين.!!!
يعني انتي يتقدملك اخو الشخص اللي بتحبيه وتلاقيه معاه وقبلها بيقولك جاينلكم البيت في موضوع مهم..واخوا جاي يخطبك. انتي بالعقل هتروحي للشخص ده وتسأليه انت بتحبني ولا لا!!!! او انت ليه ما خطبتنيش انت!!!؟
مستحيل طبعااا اي واحدة هتعمل كدة..
انا عتابي الوحيد وخطأ خديچة انها زي ما انا وضحت خلال السرد..انساقت وراء شيطانها وخالفت اخلاقها ودينها انها فكرت تتجوز مروان علشان تكون جنب زين يعني هو مش هيبقي زوجها بس اهو يبقي قصادها..تشوفه…وتحس بيه…..لا حسبت حساب العذاب ولا العقاب…
ونتيجة ده كانت ايام ولايالي طويلة بتتألم وتتعذب… وهي عايشة ميتة مع شخص بجسدها بس لكن قلب وروح ملك زين..
وده كان منتهي الظلم لمروان مهما كان سئ وظالم..هو ما اجبرهاش تتجوزه…خصوصا انها وافقت بكامل ايرادتها وحريتها كان الافضل تبعد عن الاتنين ولو حتي عاشت سنين من غير زواج…..
وده درس لكل واحدة قلبها مع حد اياكي ثم اياكي تتخيلي انك هتقدري تنسي انسان بإنسان.مستحيل لان الاول انسان له مواقف ورصيد في قلبك..وايا كانت اسباب بعده بس بعد..والتاني مالوش ذنب تكوني معاه بنصف انسانة..دي منتهي الانانية…يا تنسي وتبدأي من جديد وانتي متأكدة انك نسيتي وتجاوزتي الماضي والتجربة يا إما تصبري وتستني علاج القدر والوقت كفيل ينسيكي او يخليكي تتناسي..لكن طول ما قلبك بيدق ولسة حنينك للماضي صاحي اوعي تظلمي نفسك ولا تظلمي قلب ثالث معاكي كل ذنبه انه حبك وجالك لحد عندك…
بس هنرجع تاني ونقول ** القدر…هو اللي كان مقدر زواجها من مروان برغم كل ده لشئ وحكمة وسبب..بس المهم انها ندمت وتابت عن وسوسة الشيطان وتجاهلت كل الاسباب اللي ممكن تقربها من زين وحاولت تتأقلم مع مروان وساعدته ووقفت جنبه في محنته…وعلشان كدة ربنا جعلها سبب في هدايته وهو كمان عوضها عن كل الاذي اللي سببهولها…
مروان*** مروان هو اكبر مستفيد من كل الحكاية دي….عاش لاهي عاصي ضعيف قصاد شهواته ونزواته…لا عارف يرجع ولا قادر يكون احسن… ربنا سبحانه يعلم قدر مروان ووقته وساعة موته…ولحكمة عنده ربنا كتبله التوبة وحسن الخاتمة…ليه!!! وعمل ايه علشان ربنا يسخرله كل دول علشان يهديه!!!! ماحدش يعلم ولا يعرف..
