سر جواز بنتى زهرة الربيع

رحت ازور بنتي في بيتها في الارياف بس جوزها قالي انها راحت تزور والدته العيانه، استغربت جدا لاني كلمتها بالليل وقولتلها اني هاجي من القاهره عشان ازورها ، بس لما قولتله هنروحلها عند والدتك اتجمد وبقى يبصلي كانه شايف شبح واللي شوفته عند امه كشفلي السر اللي عملو المستحيل عشان يخبوه عني!!!! انا سناء ام منه.. منه دي مش بس بنتي، دي تحويشة عمري، وفرحتي الوحيدة اللي طلعت بيها من الدنيا بعد ما جوزي الله يرحمه سابني وتوفى. لما كبرت وبقت عروسة زي القمر، جالي محمد ابن صاحب جوزي يتقدملها.. ناس من الأرياف طيبين ومعروفين، ونعرفوهم من حياة المرحوم جوزي. وبنتي تعرفه ومعجبه بيه..وافقت عليه وانا مبسوطه جدا اني خلاص هشوفها عروسه بفستان ابيض يوم الفرح، وأنا دموعي نازلة من الفرحه جاتلي أم العريس.. ست بشوشة كده وكلامها حلو حطت إيدها على كتفي وقالتلي بنبرة حنونة يا سناء يا أختي متقلقيش على بنتك واطمني.. دي هتعيش في شقة لوحدها، بيت من بابه بعيد عن بيتنا بمسافة، محدش هيدايقها ولا يتعبها. ابتسمت وقولتلها ربنا يديم الود يا أم محمد.. أنتو ناس طيبين وعلى راسي، وحتى لو كانت ساكنة معاكم في نفس الأوضة مش هخاف عليها منكم، ده أنتو الأصول كلها. ساعتها اتفاجأت ب نهله اخت العريس حطت إيدها على بوقها وطلعت منها ضحكة غريبة جدا.. ضحكة تريقه زي ما اكون قلت نكته ضحكتها! و لقيت أمها نغزتها بإيدها في جنبها وزغرتلها بعينها زغرة خلتها تسكت فوراً وتوطي رأسها في الأرض. أنا استغربت الحركة أوي..بس قولت في بالي يمكن متقصدش حاجه او بتضحك على حاجه تانيه وعديت الليلة ورجعت القاهره لبيتي الفاضي عليّا. مرت الأيام، وكنت كل يوم أكلم منه في التليفون.. بس قلب الأم دليل. كل ما أكلمها فيديو، ألاقيها مش على بعضها. تتكلم كلمتين وتبلع ريقها بصعوبة، وكان في عينها خوف واضح، وتفضل تبص وراها كل شوية ! أسالها مالك يا منه؟ بتبصي وراكي ليه يا حبيبتي؟ فيه حد جنبك؟ ترد بصوت مهزوز أبداً يا ماما. . ده بس أنا خايفة حد يخبط على الباب ومسمعوش. قلبي ما كانش مرتاح، والشك بياكل في صدري. وبعد جوازها ب ١٥ يوم بالتمام والكمال، كلمتها فيديو.. أول ما فتحت الخط اتصدمت! عينيها كانت حمرا جدا، وكانها كانت بتبكي. قولتلها مالك يا بنتي؟ عينكي مالها حمرا كده ليه؟ جوزك زاعلك؟ ردت بسرعة وهي بتحاول تبتسم لا يا ماما والله.. ده أنا كنت بخرط بصل كتير أوي للمحشي، والبصل حامي شوية. قلت لها ومن غير ما أفكر طب بقولك إيه.. أنا مش قادرة على بعدك أكتر من كده، أنا جاية أزورك بكرة! أول ما نطقت الجملة، إيد منه اترعشت، وطبق صيني كان في إيدها وقع اتدشش على الأرض ميت حتة! وشها اتخطف وبقى لون الملاية البيضا، وقالتلي بكرة؟! بكرة ليه يا ماما؟! استغربت جداً من ردها وقولتلها إيه يا منه؟ هو إنتي مش عايزة تشوفيني ولا إيه؟! البنت اتوترت أكتر، وبقت تفرك في إيديها وقالت ما.. ما أنا بشوفك في التليفون أهو يا ماما! بصيت للشاشة بذهول وزعلت جدا منه خدت بالها من زعلي ووشي ، فقالت بسرعه… مش قصدي يا ماما والله! أكيد نفسي أشوفك .. بس.. بس لو كنتي قولتيلي قبلها بيومين ولا حاجه كنت جهزت استقبال يليق بيكي ! رديت بتعب أنا مش عايزة استقبال ولا عزومات ولا هيصة.. أنا عايزة أشوفك قدامي واحضنك وأطمن عليكِ. البنت ابتسمت ابتسامة مكسورة وقالتلي خلاص يا حبيبتي.. تشرفينا وتنورينا. قولتلها خلاص، بكرة هكون عندك من النجمة، قولي لجوزك بقى. قفلت معاها وما نمتش طول الليل.. كنت بحاول اطرح الأفكار السودا من دماغي، واصبر نفسي إني هشوفها اخيرا تاني يوم الصبح بدري، ركبت ومشيت من القاهرة للأرياف، وأنا بعد في الساعات والدقايق عشان تفتحلي الباب وأخدها في حضني. وصلت البيت.. خبطت على الباب بس أول ما اتفتح، خاب أملي تماماً! اللي فتحلي كان جوزها، مش منه. دخلني ورحب بيا جداً ببشاشة زايدة عن اللزوم يا أهلاً يا حماتي! نورتينا والله، اتفضلي اتفضلي. دخلت الشقة وأنا بأتلفت حواليا وقلتله بلهفة أمال منه فين يا محمد؟ قال بهدوء شديد وبارد راحت لأمي.. اصل أمي تعبت شوية ورنت عليها وقالتلها تعالي، ومنه اتكسفت تقولها لا. اتصدمت جدا أنا مكلمة منه باليل وقايلالها إني جاية المشوار ده كله من القاهرة عشانها، معقولة مقدرتش تعتذر بحجة إن أمها جاية في السكة؟! بصيتله بذهول وقولتله إزاي بس؟! ده أنا قايلالها امبارح إني جاية ! ابتسم بهدوء مستفز أوي، وقالي الجيات كتير يا حماتي متكبريش الموضوع.. تشربي إيه بقى؟ رديت بيأس وقلة حيلة أي حاجة.. أي حاجة يا محمد. قام وراح على المطبخ يعمل شاي وانا بقيت أبص حواليا بقلق وشك بياكل فيا… معقولة بنتي تمشي وهي عارفة إن أمها جاية وعلى وصول؟ ومعقولة حماتها تبعتلها اصلاً في يوم زي ده وهي عارفة إني جاية أزورها؟ في إنّ في الموضوع.. فيه حاجة غلط شغالة من ورايا! أول ما خرج محمد من المطبخ وشايل صينية الشاي، وقفت بسرعة ومن غير مقدمات قولتله هنشرَب الشاي عند والدتك.. هروح أطمن عليها بالمرة وأشوف بنتي هناك. محمد اتصدم، والشاي وقع من إيده والصينية اترزعت على الأرض اتكسرت ! أنا استغربت أكتر وأكتر، وركبي بقت تخبط في بعضها من الرعب على بنتي.. محمد حاول يهدى بس ملامحه كانت فاضحاه وعرق غريب نازل من جبهته، قالي وهو بيتأتأ طب.. طب ما ممكن تستنيها هنا يا حماتي؟ يمكن شوية وتيجي.. أو.. أو تبقي تزوريها يوم تاني، أمي تعبانة وو! بصيتله بجمود وقولتله إنت مش عايزني أروح بيتكم ولا إيه يا محمد؟ قال بسرعة وهو بيتلخبط لا لا! ده كلام برضه يا حماتي؟ أنا قصدي يعني بدل ما تتعبي نفسك.. إنتي عارفة الطريق لحد بيت أمي زرع ومتعرج ومقرف وهيتعبك في المشي. ما أديتوش فرصة يكمل، مسكت شنطتي بقوة واتجهت بخطوتي ناحية الباب وأنا بقول أبداً، مفيش تعب ولا حاجة.. الحجة تعبها راحة ولازم أطمن عليها بنفسي، مش أصول أبداً أمشي وهي تعبانة وأنا على بابها. نزل معايا ومحمد بيمشي خطوة ويرجع خطوة، كان متوتر بشكل مش طبيعي، عينيه كانت بتزيغ في الزرع حوالينا وكان بيتنفس بصعوبة. وأنا ماشية جنبه وبصات التوتر دي بتخليني أغلي من الخوف.. قلبي كان بيتقطع وبيتنفض، يا ترى إيه السر اللي مخبيينه عني؟ بنتي مالها وايه اللي بيحصلها في البلد دي؟ وصلنا بيت أمه.. بيت طين قديم محاط بالشجر، الباب خشبي كبير محمد قرب وخبط بقلق.. وأول ما اتفتح ودخلنا فهمت كل المستخبي واتكشف السر اللي عملوا المستحيل عشان معرفهوش وياريتني ما عرفته الصدمة كانت أكبر من عقلي بكتير!!!! أول ما الباب اتفتح، خرجت منه نهلة، أخت محمد.. بس وشها كان أصفر زي الليمونه، وعينيها رايحة جاية برعب بيني وبين محمد. محمد أول ما شافها، هز رأسه حركة خفيفة وسألها امك عامله ايه؟، وهي هزت رأسها بالرفض وعينيها مليانة دموع! دخلت البيت وأنا رجليا مش شايلاني الريحة جوه البيت كانت غريبة، ريحة بخور حامي مخنوق مع ريحة أعشاب كتمت نفسي، والبيت كان مظلم من بره رغم إننا كنا في عز الظهر. صوت أنين دافئ وجاي من آخر الكوريدور، صوت أم محمد.. بس مش أنين تعب عادي، ده كان صوت شديد! قلت بخوف وصوت مرتجف بسم الله.. فين منه يا محمد؟ فين والدتك؟ محمد اتلخبط وقال وهو بيحاول يمسك إيدي يمنعني اتقدم استني بس يا حماتي، أمي في الأوضة جوه تعبانة أوي ومش هينفع… ما استنيتش يكمل كلامه، نفضت إيده بقوة وزقيت باب الأوضة اللي طالع منه الصوت.. وهنا كانت الصدمة اللي خلت قلبي هيقف، وركبي مش شيلاني! على السرير كانت نايمة أم محمد، بس مش زي ما عرفتها يوم الفرح.. وشها كان شاحب كأنه شبح، وعينيها مربوطة بشاش أبيض من جبهتها. وجنب السرير.. منه! منه بنتي، تحويشة عمري، كانت قاعدة على الأرض، إيديها وجسمها كله بيترعش، ولابسة جلابية ممزقة من عند الكتف، وعلى دراعها أثر علامات زرقا وحمرا! البنت كانت ماسكة طبق فيه مية دافية وبتكمد جبهة حماتها، وأول ما دخلت وبصيتلي، عينها جات في عيني..صرخت صرخة مكتومة وغطت وشها بإيديها وبقت تبكي بحرقة وتشهق ماما! يماما امشي.. امشي من هنا أرجوكي!

مقالات ذات صلة

معجزة ورق الغار ستجعل بطنك مسطحا وشعرك كثيف

احببت خديجة ريحانة الجنة ج١٣

احببت خديجة ريحانة الجنة ج٨

ولـ,ـاعة جوزي

ميار الببلاوى: إيناس النـ,ـجار فى غسلها كانت عروسة مبتسمة زى القمر

حكاوى شيمو ج١

اترك تعليقاً إلغاء الرد